Nova
Portos de Galicia reordena o peirao de Canido e crea máis prazas de aparcadoiro e unha senda segura para o acceso da cativada á rampla de varada
1 de 2
2 de 2
Os traballos incluíron tamén a dotación de estacionamentos para persoas con mobilidade reducida e a mellora do edificio de departamentos para os mariñeiros
Vigo, 25 de setembro de 2025
Portos de Galicia, ente adscrito á Consellería do Mar, rematou as obras de reordenación da circulación no porto de Canido, no municipio de Vigo que permitiron mellorar a seguridade e operatividade para o tránsito rodado e peonil nunha zona de especial concorrencia de vehículos.
A través destes traballos, Portos de Galicia dotou a zona de máis prazas de aparcadoiro xerais ademais de habilitar novas prazas de estacionamento para persoas con mobilidade reducida. Así mesmo, delimitouse unha senda peonil para o tránsito seguro do alumnado das actividades náuticas cara á zona de varada, que tamén se repintou e sinalizou de novo.
Ademais, entre as medidas para a mellora da circulación definiuse un carril de tránsito peonil entre o valado do peirao e as prazas de aparcadoiro de xeito que queda definido o itinerario para os viandantes.
Finalmente, as obras atenderon tamén as necesidades do sector profesional portuario de Canido a través da reforma do edificio de departamentos para os mariñeiros. Reparáronse fendas no exterior, instaláronse tapas de contadores e mellorouse, en xeral, a fachada do inmoble.
