Vostede está aquí

Nova

Anfaco doa 1000 latas de conservas a catro entidades sociais presentes no espazo solidario de Nadal da Xunta de Galicia
  • A patronal da industria conserveira elixiu entre as 24 ONGs a AFAN, o Comedor da Esperanza, Misioneras del Silencio e Vida Digna pola súa axuda directa ao necesitado
  • As conselleiras de Medio Ambiente, Territorio e Vivenda, Ángeles Vázquez, e do Mar, Rosa Quintana, visitaron hoxe o Tinglado, no que participan activamente
  • O Festival de Panxoliñas “Vigo, Xacobeo do Nadal” e a agrupación Mariachi “Noche de Ronda” encargáronse de amenizar a noite deste luns coas súas actuacións
  • Cómpre lembrar que o cerne deste espazo son as 24 entidades e organizacións sociais participantes coas que o Goberno galego busca fomentar a solidariedade
  • O xoves espérase a visita do vicepresidente da Federación Galega de Fútbol, dos xogadores do Celta Integra e a actuación de “Vigo o Xacobeo coas Bandas Escolas”
     

  • Vigo,30 de decembro de 2019.- O Nadal Solidario da Xunta de Galicia viviu hoxe unha xornada de intensa actividade, na que o secretario xeral de Anfaco-Cecopesca, Juan Vieites, anunciaba unha doazón de 1.000 latas de conservas para catro das 24 ONGs e organizacións sociais presentes no Nadal Solidario.

    En canto á elección, a patronal da industria conserveira explicou que elixiu a Afan, Vida Digna, o Comedor da Esperanza e Misioneiras do Silencio pola súa relación directa coa axuda o necesitado. Unha noticia que coincidía coa presenza no Tinglado do Porto das conselleiras de Medio Ambiente, Territorio e Vivenda, Ángeles Vázquez, e do Mar, Rosa Quintana, que participan activamente no espazo solidario ideado pola Delegación Territorial da Xunta en Vigo.

    Durante a visita, na que as representantes do Goberno galego puideron coñecer as actividades que se están a desenvolver no Nadal Solidario e degustar as tapas elaboradas polo chef Carlos Fernando Colmenero no showcooking ofrecido na caseta Cata la Lata coa que colabora Anfaco, Corina Porro non desaproveitou a oportunidade de agradecerlles a súa colaboración.

    O Festival de Panxoliñas “Vigo, Xacobeo do Nadal” volvía a subirse ao escenario e xunto á agrupación musical Mariachi “Noche de Ronda” encargáronse de amenizar a noite deste luns coas súas actuacións.

    E o ano arrancará o xoves neste Espazo Solidario de Nadal coa visita do vicepresidente da Federación Galega de Fútbol, dos xogadores do Celta Integra e a actuación de “Vigo o Xacobeo coas Bandas Escolas”.

    Espazo solidario

    Cómpre lembrar que o cerne desta iniciativa son as 24 ONGs e organizacións solidarias participantes coas que o Goberno galego busca fomentar a solidariedade. Un lugar no que vigueses, turistas, peregrinos e empresarios poderán achegarse para aportar o seu grao de area. Un espazo, ideado pola Delegación Territorial de Vigo en colaboración coa sociedade civil e coa implicación de varias consellerías da Xunta e o Porto de Vigo, que busca canalizar a expresión solidaria dos cidadáns, pero que é moito máis, xa que permitirá encher a cidade de Vigo de cultura e tradición.

    Deste modo, a iniciativa ten como obxectivo traballar coa sociedade civil, con entidades solidarias, fomentar accións participativas de ambiente familiar e colaborar en positivo coa cidade cun nadal próximo, xeneroso e solidario, con máis dun cento de actividades ao longo de todo o día en horario de 12 da mañá ás 10 da noite, estendéndose á medianoite os sábados e domingos.

    Un proxecto co que se procura pór o foco de atención sobre os aspectos máis tradicionais do Nadal, nun espazo pensado para todos os públicos, coas familias como prioridade, cun programa que protagonizan os vigueses de principio a fin.

    Nacemento da Catedral de Santiago

    Un dos aspectos máis atraentes no interior do Tinglado é a mostra do Belén da Catedral de Santiago de Compostela, que en 60 metros cadrados amosa preto de 500 pezas articuladas. Asemade, hai tamén demostración de oficios tradicionais, concertos de coros infantís, jazz, teatro e danza.

    O apartado da animación corresponde á Federación de Bandas de Música Populares de Vigo e Asociacións de Corais Polifónicas, rondallas e agrupacións teatrais da cidade. Están presentes, alumnos da Escola de Arte Dramático, o coro infantil da Fundación Mayeusis, a Coral Casablanca ou os Bolechas, entre outros. Asemade, grupos locais e de jazz encárganse de amenizar no horario ampliado ata as 00.00 horas as noites dos sábados e domingos.

    Á decoración tradicional do Nadal se suman, no interior do Tinglado, nove casetas de madeira que contan actividades propias nas que participan a Autoridade Portuaria de Vigo, que dá a coñecer os seus ambiciosos proxectos medioambientais; a Consellería de Medio Ambiente, coa celebración de talleres infantís que ofrecen desde experimentos de “Ciencia Divertida” ata actividades de reciclaxe e concienciación medioambiental; a Consellería de Mar, con actividades informativas das súas campañas; a Consellería de Cultura e Turismo e a Consellería do Medio Rural, que poñen o foco de atención nos seus diferentes programas; Anfaco, que fai demostracións de conservas, degustacións e organiza talleres informativos e showcookings; e as 24 ONGs que, en diferentes quendas durante as mañás e as tardes, teñen a oportunidade de trasladar o seu proxecto solidario á cidadanía.

    Teñen así representación, APAM, Aspanaex, San Rafael, San Francisco, Igualarte, Down Vigo, Alento, Cáritas, o Comedor da Esperanza, as Misioneras do Silencio, AFAN, Ayuvi, Afaga, Asdegal, Red Madre, a Fundación Balms, Fundega, Discamino, Bicos de Papel, Asanog, Fundación Stop, Vida Digna, a Fundación Magar e a Asociación de Xordos de Vigo.

    Así mesmo, a programación conta con xornadas especiais para os colexios, centros sociais de maiores e os nenos oncolóxicos do Hospital Álvaro Cunqueiro.

    Por último, a Fundación Celta de Vigo trouxo xogadores do equipo de primeira división e do equipo Integra, formado por deportistas con discapacidade (gañadores este ano da Copa de España), cos que os visitantes puideron compartir momentos e pedirlles autógrafos.

    Poboado de Nadal, Reis Magos e carrusel

    Xa no exterior do Tinglado, na viguesa Praza da Estrela, hai disposto un poboado de Nadal e unha gran caseta onde o Paxe real recollerá as cartas dos máis pequenos da casa. Un espazo que completan o clásico carrusel e grandes figuras representando aos Reis Magos e ao tradicional moneco de neve. O eixo principal desta decoración é o Camiño de Santiago e os seus símbolos: a vieira ou as mouteiras.

    Tamén participan no exterior as asociacións de comerciantes de Vigo, que se aquendan para ofrecer información sobre campañas para as compras do Nadal nos barrios de Vigo; ou a Dirección Xeral de Xuventude, con animación xuvenil e máis de voluntariado para os mozos vigueses.

    Hai casetas para garapiñadas e castañeiras tradicionais e un grupo de foodtrucks, entre os que participan: Pescanova, Frutas Nieves, La Joaquina e La Pepita. Todas elas contribuirán a este Nadal Solidario doando parte da recadación ás ONGs.

    No solpor das fines de semana hai concertos de grupos vigueses.
     

    Galeria de imaxes