Nova
Villares pon en valor os investimentos na lonxa de Muros ao abeiro das axudas para equipamentos portuarios da Xunta que superaron os 360 mil euros
1 de 3
2 de 3
3 de 3
As actuacións consistiron na adquisición dunha máquina de xeo compacta, unha carretilla elevadora, novos equipos de pesaxe, mesas e palets para a clasificación e exposición do produto así como unha fregadora aspiradora
Este ano esta prevista a instalación dun silo orbital de xeo que substituirá o actual de peines o que suporá un importante aforro económico á confraría en reparacións e custes enerxéticos
O titular de Mar anunciou que este ano darase continuidade a estes apoios autonómicos coa publicación da nova orde de axudas dotada con 9 millóns de euros
Muros (A Coruña), 8 de xaneiro de 2025
O conselleiro do Mar, Alfonso Villares, fixo unha visita á lonxa de Muros onde para coñecer a execución dos investimentos realizados na instalación ao abeiro das axudas autonómicas destinadas á modernización das infraestruturas e equipamentos portuarios. No caso da rula muradán as actuacións consistiron na adquisición dunha carretilla elevadora, unha nova máquina de xeo, novos equipos de pesaxe, mesas e palets para a clasificación e exposición do produto Así como unha fregadora aspiradora.
Ademais, este ano está prevista a instalación dun silo orbital de xeo, en substitución do actual de peines que dada a súa antigüidade e características técnicas supoñía elevados costes en reparacións e enerxía. Este actuación permitirá garantir o abastecemento de xeo aos usuarios, facilitando a conservación dos produtos da pesca en óptimas condicións para a súa comercialización.
O responsable autonómico puxo en valor o impacto destes apoios na competitividade e sustentabilidade do sector pesqueiro e que se viu reflectido no elevado número de proxectos colectivos presentados na última convocatoria. Así, recordou que co obxectivo de atender todas as solicitudes, ampliouse o crédito en case 3,4 millóns de euros o que fixo posible financiar 47 proxectos, entre os que destacan os dirixidos a mellorar a trazabilidade dos produtos desembarcados que representan o 38% e os destinados a mellorar a seguridade e as condicións de traballo das persoas pescadoras que representan o 36% dos proxectos.
Alfonso Villares anunciou que o Goberno galego dará continuidade a estas axudas coa publicación dunha nova convocatoria ao longo deste mes de xaneiro que mobilizarán 9 millóns de euros. Unha cifra, dixo o responsable autonómico, que demostra con feitos o compromiso da Xunta na tarefa de un sistema portuario pesqueiro máis eficaz economicamente, tecnoloxicamente avanzado, socialmente integrador, enerxeticamente eficiente e que contribúa á neutralidade climática.
