Nova

Oroso (A Coruña), 3 de abril de 2025

A delegada da Xunta, Belén do Campo, visitou, acompañada polo alcalde de Oroso, Alex Doval, a escola unitaria de Deixebre dentro da campaña GALICIA SABE AMAR, impulsada pola Consellería do Mar, que continúa levando o mellor sabor das rías galegas a través de foodtrucks aos escolares da comunidade. A foodtruk visitou, ao longo do día, os catro Colexios Rurais Agrupados (CRA) deste Concelllo (Deixebre, Senra, Trasmonte e Vilacide)

Na visita a delegada da Xunta puxo en valor a importancia de promover o consumo entre a xente máis nova nun contexto de progresivo descenso da presenza destes alimentos na cesta da compra da cidadanía. Nesta liña, subliñou os múltiples beneficios para a saúde que supón a inclusión do peixe e marisco no marco dunha dieta equilibrada pola súa riqueza nutritiva.

A representante do Goberno autonómico subliñou a importancia de que a cidadanía teña bos hábitos alimenticios. Nesta liña, resaltou a necesidade de reverter a tendencia de descenso de consumo de peixe e marisco dos últimos anos xa que son alimentos que contan con propiedades nutritivas excepcionais, como os ácidos graxos Omega 3 e practicamente todos os minerais precisos para unha alimentación completa e saudable.

A delegada puxo en valor esta iniciativa que, ademais de fomentar o consumo dos produtos pesqueiros na cesta da compra dos galegos, tamén contribúe a divulgar a súa excelente calidade, reforzando á vez a un sector estratéxico para a economía galega que representa preto do 5% do PIB e do que dependen ao redor de 50.000 empregos. Unha liña de traballo na que se afonda nos Orzamentos do 2025 mobilizando máis de 20 millóns de euros, un 75% máis que no 2023, para campañas de promoción, a mellora da comercialización dos produtos pesqueiros e acuícolas e ao estudo de patróns e tendencias de consumos.