Nova
A campaña Galicia sabe AMar divulga entre o alumnado do CEIP Illa Verde de Lugo os beneficios de consumir produtos do mar
1 de 2
2 de 2
O delegado territorial da Xunta visitou a foodtruck que recibiu aos estudantes deste centro educativo ao longo da mañá
Lugo, 29 de maio de 2025
O delegado territorial da Xunta, Javier Arias, visitou o CEIP Illa Verde, de Lugo, onde esta mañá se instalou unha das foodtrucks da campaña GALICIA SABE AMAR, impulsada pola Consellería do Mar, para achegar aos escolares o mellor sabor das rías galegas.
Arias puxo en valor a importancia desta iniciativa “para promover o consumo dos produtos do mar entre os máis novos”, nun contexto de progresivo descenso da presenza destes alimentos na cesta da compra da cidadanía, e subliñou os múltiples beneficios para a saúde que supón a inclusión de peixe e marisco no marco dunha dieta equilibrada pola súa riqueza nutritiva.
O delegado territorial subliñou que, ademais de fomentar o consumo dos produtos pesqueiros, a campaña promovida pola Xunta “contribúe tamén a divulgar a súa excelente calidade, reforzando á vez un sector estratéxico para a economía galega que representa preto do 5% do PIB e do que dependen ao redor de 50.000 empregos”.
As foodtrucks de GALICIA SABE AMAR visitaron tamén este xoves os CEIP de Albeiros (Lugo), As Nogais e Cervantes. Mañá, a campaña chegará aos colexios de Lousada e Tino Grandío, de Guntín; Eduardo Cela Vila, de Triacastela; e Poeta Uxío Novoneira, de Folgoso do Courel.
