Nova

Vigo, 3 de xuño de 2025

Co gallo da celebración do Día Internacional dos Océanos, que se conmemora o vindeiro 8 de xuño, o Centro Tecnolóxico do Mar-Fundación CETMAR lanza unha campaña participativa baixo o título de “Un Mar de Falas”. O seu obxectivo é afundir no imaxinario colectivo a diversidade de voces e palabras relativas ao mar e compilar todas aquelas relacionadas con esta temática.

A campaña, que dará comezo hoxe nas diferentes contas de CETMAR en redes sociais, artéllase a través dun hashtag único, #UnMarDeFalas, admitindo propostas en calquera lingua.

Para participar haberá que escoller unha palabra -redeira, maraxe, batea, etc.- e compartir nunha mensaxe ou comentario o seu contexto, que pode ser desde unha anécdota ata un recordo familiar asociado, un verso ou un oficio que a describa. A publicación debe ir acompañada da etiqueta #UnMarDeFalas.

Unha vez finalizada a campaña, cada aportación formará parte dunha gran onda con todas as palabras recollidas, que se plasmará nun mural colectivo en formato dixital e físico e que será testemuña da memoria viva mariña.

Esta iniciativa, coa que CETMAR pretende conectar directamente coa meta do ODS 14 de “Conservar e utilizar de forma sostible os océanos, os mares e os recursos mariños”, responde así á vontade de fomentar a participación pública e a concienciación ambiental mediante un achegamento simbólico ao mar.

Ao convidar á cidadanía a reter e compartir vocabulario mariño, “Un Mar de Falas” reivindica o mar como un ben común, situado no corazón da cultura e da identidade local, e abre portas á co‐responsabilidade na súa conservación.

Coa mirada posta no futuro, o Centro Tecnolóxico do Mar agarda converter esta iniciativa nunha cita anual que vaia engadindo novas linguas, novas xentes e novas palabras.