Nova
A Xunta conclúe a descentralización das titulacións náuticas de lecer para ofrecer un servizo máis áxil e próximo
A Consellería do Mar fixo efectiva dende o pasado mércores a xestión descentralizada destes títulos tras concluír a formación específica do persoal das delegacións territoriais
O novo modelo busca reducir os tempos de espera para a cidadanía nun sector que en 2025 iniciou 3.576 expedientes e sumou 5.551 licenzas emitidas por escolas homologadas
A administración autonómica xa traballa en replicar este mesmo proceso coas titulacións profesionais para dar resposta ás demandas do sector marítimo-pesqueiro
Santiago de Compostela, 14 de xuño do 2026
A Consellería do Mar fixo efectiva dende o mércores a tramitación descentralizada das titulacións náuticas de lecer en Galicia. Con este paso conclúe un proceso de reestruturación no que o departamento autonómico veu traballando intensamente, co obxectivo de ofrecer un servizo de maior proximidade e adaptado ás necesidades dos usuarios.
Para garantir a correcta implantación do modelo, realizáronse dúas xornadas formativas específicas dirixidas ao persoal das delegacións territoriais. A primeira delas tivo carácter presencial na Escola Galega de Administración Pública (EGAP) e a segunda desenvolveuse de xeito telemático.
Esta descentralización suporá un importante avance na redución dos prazos e unha maior axilidade na resolución dos procedementos de recreo. O volume de actividade deste eido é moi significativo na comunidade, de feito, ao longo do pasado ano 2025 iniciáronse un total de 3.576 expedientes relacionados con estas titulacións. A maiores, as escolas de recreo homologadas expediron 5.551 licenzas de navegación.
No balance detallado do exercicio 2025, o Patrón de Embarcacións de Recreo (PER) situouse á cabeza con 2.290 títulos tramitados (912 expedicións e 1.378 renovacións). Séguelle o Patrón de Navegación Básica (PNB) con 634 expedientes (290 expedidos e 344 renovados), o Patrón de Iate con 317 xestións (138 expedidos e 179 renovacións) e o Capitán de Iate, que sumou 128 títulos entre as 53 novas expedicións e as 75 renovacións efectuadas.
Próxima extensión ás titulacións profesionais
O éxito na implantación deste sistema nas titulacións de lecer marca a folla de ruta de cara aos vindeiros meses. Nese sentido, a Consellería do Mar avanza que xa se está a traballar para replicar este mesmo proceso de descentralización administrativa coas titulacións profesionais. Con esta medida, a Xunta busca dar unha resposta eficaz e directa ás demandas do sector marítimo-pesqueiro galego, optimizando a burocracia e facilitando as xestións vinculadas aos profesionais do mar.
