Nova
A Xunta reforza o seu apoio ao 'Vigo Seafest' para promover o consumo de peixe e enxalzar o traballo da frota galega
1 de 5
2 de 5
3 de 5
4 de 5
5 de 5
A conselleira do Mar, Marta Villaverde, inaugurou hoxe a VII edición do Festival ARVI do Peixe, un evento que conta cunha achega autonómica de máis de 118.000 euros para achegar o complexo mar-industria á cidadanía
A responsable autonómica subliñou o papel de Vigo como "grande capital europea da pesca" e aplaudiu o compromiso ineludible dos armadores cos principios da sustentabilidade e as boas prácticas
Vigo, 10 de xullo de 2026
A conselleira do Mar, Marta Villaverde, acompañada pola delegada territorial da Xunta de Galicia en Vigo, Ana Ortiz, inaugurou esta mañá a nova edición do Festival ARVI do Peixe - Vigo SeaFest 2026 impulsada pola Cooperativa de Armadores de Vigo (ARVI). No acto, a titular de Mar destacou que este evento lúdico e divulgativo constitúe "unha fórmula idónea e poderosa" para poñer en valor a actividade dos profesionais do mar, espertar a curiosidade social e consolidar a proxección internacional da frota viguesa.
A Xunta financia esta cita de referencia para a gastronomía mariña cunha achega de 118.640 euros. O prato forte do evento articúlase arredor do certame culinario Fish & Beer 1906, que nesta edición conta co prestixioso chef Manuel Costiña (estrela Michelin) como presidente do xurado técnico. Un total de 14 recoñecidos chefs locais desafiarán a creatividade culinaria preparando tapas de autor a prezos populares baseadas en sete especies clave capturadas pola frota galega como o bacallau, a sardiña, o tamboril, a raia, a pescada, o peixe espada e a lura.
Marta Villaverde celebrou de xeito especial que o programa deste ano dedique un espazo moi amplo ás actividades familiares e infantís, como os obradoiros de cociña, as visitas guiadas á lonxa ou a tradicional técnica xaponesa do Gyotaku para a impresión de peixes. "É esencial reconectar cos máis novos, fomentando o consumo dos saudables produtos mariños desde idades temperás, porque deles depende o porvir do consumo, o vigor do sector e a necesaria remuda xeracional", manifestou a conselleira.
Finalmente, a titular de Mar aplaudiu a perfecta simbiose do festival ao incorporar actividades deportivas como torneos de baloncesto 3x3, waterpolo ou natación artística coordinados co Real Club Náutico de Vigo, o que plasma un modelo integral de vida saudable que combina o exercicio físico coa excelencia nutricional e gastronómica dos produtos do noso mar.
