Nova
Villaverde destaca a relevancia dos proxectos desenvolvidos no marco do PCUMA para poñer en valor o patrimonio marítimo galego
1 de 3
2 de 3
3 de 3
A conselleira do Mar e o director do Plan de Cultura Marítima de Galicia, Óscar Fuertes, avaliaron o avance das accións que teñen como horizonte o ano 2030
Santiago de Compostela, 14 de xullo de 2026
A conselleira do Mar, Marta Villaverde, reuniuse co director do Plan de Cultura Marítima de Galicia (PCUMA), Óscar Fuertes, para realizar o seguimento e balance das accións executadas ao abeiro deste documento estratéxico. O plan, concibido coma unha folla de ruta transversal para protexer, poñer en valor e difundir a herdanza marítima da comunidade autónoma, conta cun total de 100 medidas programadas para a súa implantación progresiva antes de que remate esta década.
Durante o encontro, avaliouse de forma moi positiva a implantación de proxectos pioneiros coma a delimitación das denominadas "Áreas Nai" de interese cultural ou o desenvolvemento do Censo de Patrimonio Marítimo Inmoble, que xa constitúen ferramentas tanxibles para a cidadanía. Marta Villaverde salientou que o PCUMA non só salvagarda o noso legado histórico e a fisionomía singular do litoral galego, senón que tamén funciona como un motor de dinamización que analiza novas oportunidades de desenvolvemento social e económico vinculadas a estas contornas.
Finalmente, a titular de Mar puxo en valor que este plan serve para dar visibilidade á dimensión humana do noso litoral, rendendo homenaxe aos máis de 50.000 empregos que hoxe en día vertebran e manteñen viva a cadea de valor do sector mar-industria en Galicia. Trátase, en palabras da conselleira, dun compromiso firme do Goberno galego cunha cultura marítima que constitúe unha das nosas principais sinais de identidade e un piar de sustentabilidade para o futuro das vilas costeiras.
