Nova

Santiago de Compostela, 8 de marzo do 2026

A consellería do Mar, no marco da liña estratéxica de apoio á promoción internacional dos produtos do mar galegos, promove a súa promoción na 51ª Foodex Japan, que se celebrará en Tokio desde o 10 ao 13 de marzo.

Deste xeito, o departamento autonómico continúa coa súa aposta polo fomento das especies capturadas e elaboradas na comunidade nun dos mercados máis esixentes e con maior tradición de consumo de peixe e marisco. E é que esta feira é unha das máis destacadas do mundo no ámbito da alimentación e bebidas, converténdose nun punto de encontro estratéxico para produtores, distribuidores e importadores do país asiático.

Conscientes de que a internacionalización é unha ferramenta clave para aumentar a competitividade do sector, o Goberno galego contempla nos orzamentos unha partida de 11 millóns de euros para o período 2026-2027. Este esforzo inversor vai destinado á revalorización dos produtos pero tamén ao aproveitamento de novas oportunidades comerciais que ofrecen estes eventos tanto para a frota galega como para a industria transformadora.

No espazo diferenciado que Mar terá no evento, daranse cita catros empresas: Conservas Cerqueira, Ramón Franco, Conservas Portomar e Pasteurizados Cíes.