Nova
Villaverde define o Cetmar como unha ferramenta clave para o ”futuro azul” de Galicia
1 de 3
2 de 3
3 de 3
A conselleira do Mar reivindica o talento, a cooperación internacional e a protección ambiental para o impulso da actividade marítimo-pesqueira
A conselleira do Mar inaugurou Diálogos do Mar, evento co que o Cetmar pon fin á programación de actos do seu 25 aniversario
Vigo, 23 de xuño de 2026
A conselleira do Mar, Marta Villaverde, inaugurou este martes Diálogos do Mar, un encontro co que o Centro Tecnolóxico do Mar (Cetmar) pecha a programación conmemorativa do seu 25 aniversario, e no que puxo en valor o talento, a sustentabilidade e a cooperación internacional como piares fundamentais do “futuro azul” de Galicia.
Acompañada pola directora-xerente do organismo, Rosa Chapela, a responsable autonómica salientou o papel desenvolvido polo centro desde a súa creación como entidade de referencia na investigación e na innovación no ámbito mariño. Neste senso, subliñou a súa contribución ao desenvolvemento sostible do complexo mar-industria galego e á proxección exterior do coñecemento xerado na comunidade.
Neste contexto, defendeu a necesidade de seguir avanzando na modernización e na dignificación das profesións vinculadas á pesca, á acuicultura e á transformación dos produtos do mar, co fin de fomentar a creación de emprego estable, atraer a mocidade e o talento feminino.
Galicia, referente en prevención
Así mesmo, e grazas ao traballo deste centro, Galicia consolídase como referente europeo en prevención, vixilancia e resposta ante ameazas ambientais no litoral. Unha fortaleza que contribúe á competitividade do sector pesqueiro e marisqueiro e ao prestixio internacional dos produtos do mar galegos.
Por iso, Villaverde defendeu a importancia da colaboración entre administracións, comunidade científica e sector produtivo co obxectivo de anticiparse aos novos desafíos climáticos; eido no que tanto o Cetmar como o Intecmar contan cunha ampla experiencia de coñecemento e xestión.
Con este acto, o Centro Tecnolóxico do Mar pecha a súa programación de aniversario reafirmando o seu compromiso cun sector marítimo-pesqueiro “máis competitivo, sostible e preparado para os retos do futuro”.
