Nova
Villaverde destaca a gran calidade do marisco galego na inauguración da XIII Festa do Percebe de Xove
1 de 4
2 de 4
3 de 4
4 de 4
Xove (Lugo), 18 de xullo de 2026
A conselleira do Mar, Marta Villaverde, encargada de dar o pregón da XIII Festa do Percebe de Xove, destacou a gran calidade do marisco galego, e dun xeito especial a excelencia deste produto do mar e a fortaleza dos percebeiros lucenses. Ademais distinguiu a franxa costeira cantábrica de Lugo como un “tesouro escondido” pola calidade do seu marisco.
A responsable autonómica destacou a orografía desta costa e os seus escarpados acantilados para acadar un “hábitat idóneo” no que atopar exemplares de percebe de gran calidade, ofrecendo aos consumidores “unha frescura e intenso sabor a mar que o fan especialmente saboroso e apreciado”. Incidiu tamén no labor dos percebeiros xovenses, e en que o marisco “nos transmite moito sobre a esencia desta vila mariñeira” e a súa fortaleza.
Durante a celebración, apoiada pola Consellería do Mar, que honra tanto aos profesionais do sector coma a este marisco, repartíronse mais de 1.500 racións de percebe das lonxas da zona.
Dende a Consellería do Mar resáltase a importancia destas celebracións gastronómicas para dar a coñecer os produtos de alto nivel que nos achega a contorna galega e poder achegalos á cidadanía, impulsando, desta maneira, a Economía Azul e favorecendo os oficios do sector marisqueiro.
