Nova
Villaverde reclama que Galicia participe na renovación do Plan de xestión da sardiña ibérica para defender os intereses da frota galega
1 de 2
2 de 2
A conselleira do Mar solicitou formalmente ao ministro Luis Planas que a comunidade forme parte dos traballos preparatorios do novo marco que entrará en vigor en 2027
A Xunta reclama revisar a actual clave de reparto entre España e Portugal e adaptar a distribución das posibilidades de pesca ao aproveitamento real que realiza a frota de cada Estado
Santiago de Compostela, 23 de setembro de 2026
A conselleira do Mar, Marta Villaverde, reclamou hoxe no Parlamento galego que Galicia participe, con plenos dereitos, nos traballos preparatorios para a renovación do plan de xestión da pesqueira da sardiña ibérica entre España e Portugal, co obxectivo de facer valer os intereses da frota galega na definición das condicións que rexerán esta actividade a partir de 2027. A responsable autonómica anunciou que xa trasladou, formalmente, esta petición por carta ao ministro de Agricultura, Pesca e Alimentación.
Durante a súa resposta a unha pregunta parlamentaria, Villaverde incidiu na necesidade de que Galicia participe en todas as fases do proceso, tanto na elaboración técnica como na toma de decisións, especialmente no relativo á revisión da actual clave de reparto entre os dous países, á porcentaxe de cota que corresponde a cada Estado e ao volume anual máximo de capturas.
Neste sentido, lembrou que o sistema vixente reserva para España o 33,5 % das posibilidades de captura, fronte ao 66,5 % de Portugal, unha distribución que a Xunta considera que debe ser revisada para avanzar cara a porcentaxes máis proporcionais ao esforzo pesqueiro real de ambos países.
A conselleira referiuse tamén á distribución interna da cota española. O 2,57 % está reservado aos buques de artes menores que empregan o xeito, mentres que o 97,43 % restante repártese nun 60 % para as frotas de cerco, piobardeira e racú do Cantábrico e Noroeste e nun 40 % para o Golfo de Cádiz. Villaverde sinalou que a Xunta leva anos presentando alegacións técnicas, en coordinación co sector, para modificar uns criterios que considera prexudiciais para a frota galega. O reparto do 2,57 % e do 60/40 figura igualmente na resolución estatal que regula a campaña de 2026.
Villaverde puxo como exemplo das últimas actuacións da Xunta a reclamación dunha cota específica para a frota do xeito dentro do mecanismo de optimización da campaña deste ano. A resolución estatal do pasado 9 de setembro incorporou 383.998 quilos de sardiña a unha bolsa común á que poden acceder os buques unha vez esgotadas as súas posibilidades de pesca.
A Xunta considera que este sistema non atende suficientemente á singularidade do xeito, que dispón dunha cota propia e dun plan de xestión con límites reducidos de captura. Por este motivo, reclamou ao Ministerio un tratamento diferenciado que permita a esta frota acceder ás posibilidades adicionais sen quedar en desvantaxe pola súa propia forma de xestión.
A titular de Mar reafirmou, finalmente, que o Goberno galego continuará mantendo o diálogo co sector e trasladando ante o Estado as súas propostas para que a futura xestión da sardiña ibérica teña en conta as características e necesidades da frota galega.
