Nova
Villaverde reúnese coa Confraría de Ferrol para avanzar na mellora da actividade pesqueira e marisqueira
1 de 2
2 de 2
A conselleira do Mar abordou co patrón maior da entidade, Gustavo Chacartegui, as principais necesidades e demandas dos profesionais da ría
A Xunta apoiou con máis de 500.000 €, nos dous últimos anos, actuacións vinculadas á xestión sostible dos recursos, á modernización das infraestruturas e á comercialización dos produtos do mar
Santiago de Compostela, 24 de setembro de 2026
A conselleira do Mar, Marta Villaverde, reuniuse hoxe co patrón maior da Confraría de Pescadores de Ferrol, Gustavo Chacartegui, nun encontro no que abordaron a situación da actividade pesqueira e marisqueira na ría e as principais necesidades trasladadas polos profesionais do sector.
A responsable autonómica reafirmou a disposición da Xunta a manter unha interlocución directa e permanente coas confrarías como entidades fundamentais para coñecer de primeira man a realidade das persoas que viven do mar e avanzar conxuntamente na procura de solucións ás súas demandas.
Neste sentido, Villaverde puxo en valor a colaboración mantida nos últimos anos coa confraría ferrolá para favorecer a sustentabilidade da actividade, a modernización das instalacións portuarias e da lonxa e a mellora da comercialización dos produtos pesqueiros e marisqueiros.
Ao abeiro do Fondo Europeo Marítimo, de Pesca e de Acuicultura (Fempa), as actuacións apoiadas pola Consellería do Mar na Confraría de Ferrol durante 2025 e 2026 superan os 500.000 euros. Entre elas figuran proxectos para reforzar a xestión dos recursos da pesca costeira artesanal, recuperar poboacións de ourizo, modernizar a lonxa e a súa fábrica de xeo, mellorar os equipamentos da peixaría e impulsar a promoción e venda directa dos produtos locais.
Durante a xuntanza analizouse tamén a importancia de mellorar as condicións nas que os profesionais desenvolven a súa actividade, ámbitos nos que a Administración autonómica vén colaborando co sector a través de distintas liñas de apoio. A conselleira reiterou o compromiso da Xunta de seguir acompañando ao sector para garantir a súa viabilidade económica, social e ambiental.
