Nova
A Xunta financia a través do GALP rutas interpretativas polo litoral de Cabanas para consolidalo como destino turístico de interese
1 de 3
2 de 3
3 de 3
A delegada de Ferrol, Martina Aneiros, acompañada do alcalde, Fernando Couce, participou hoxe na primeira das catro travesías programadas a bordo do ‘Anduriño’
A iniciativa está incluída no marco do proxecto ‘Cabanas: mar, natureza e sabores’ promovido polo Concello
Cabanas (A Coruña), 28 de setembro de 2026
A delegada da Xunta en Ferrol, Martina Aneiros, acompañada do alcalde de Cabanas, Fernando Couce, participou hoxe na primeira das rutas interpretativas polo litoral no barco Anduriño organizadas este ano polo Concello de Cabanas no marco do proxecto Cabanas: mar, natureza e sabores, un dos proxectos beneficiarios dos apoios da Consellería do Mar, despregados a través do Grupo de Acción Local do Sector Pesqueiro (GALP) Golfo Ártabro Norte.
A través do itinerario a bordo deste barco recuperado grazas a convocatorias pasadas desta liña de axudas, explórase a riqueza ambiental, cultural e pesqueira da zona co apoio de especialistas en turismo científico, oceanografía e patrimonio mariñeiro. Esta é a primeira das catro rutas programadas -haberá outra mañá e os días 5 e 6 de outubro- este ano no marco desta iniciativa que tamén incluíu percorridos a pé e á que a delegada invitou a sumarse -require inscrición previa a través da oficina de turismo-.
O proxecto Cabanas: mar natureza e sabores recibiu unha achega autonómica de preto de 40.000 euros para tres anualidades -2025, 2026 e 2027- co obxectivo de consolidar a zona litoral de Cabanas como un destino turístico de interese, apostando por un modelo sostible, inclusivo e participativo. Para iso o Concello de Cabanas, promotor da iniciativa, programou eventos de cociña mariñeira, rutas interpretativas ademais de audioguías en distintos idiomas para escoitar durante as travesías e a edición de diversos material impreso e pictogramas instalados no Centro de Interpretación do Medio Mariño (CIMM) de Cabanas que se artellou como centro de referencia para as distintas actividades.
Aneiros puxo en valor as axudas para as Estratexias de Desenvolvemento Local Participativo (EDPL), cofinanciadas polo Fondo Europeo Marítimo de Pesca e Acuicultura (Fempa) que contan cun orzamento de 10,3 M€ para as anualidades 2026-2027. Lembrou que están destinadas a confrarías de pescadores e as súas federacións, asociacións profesionais do sector pesqueiro, concellos e entidades sen ánimo de lucro, así como pequenas e medianas empresas e persoas físicas con capacidade para desenvolver unha actividade económica con domicilio fiscal e social en Galicia, entre outros, e cuxa finalidade é a de contribuír ao obxectivo europeo de permitir unha economía azul sostible nas zonas costeiras e fomentar o desenvolvemento das comunidades pesqueiras e acuícolas.
O Galp Golfo Ártabro Norte agrupa a un total de 38 entidades das cales preto do 16% pertence ao sector pesqueiro, o 26% ao sector público, o 42% ao sector social e o 13% ao sector económico ademais de agrupar a dez concellos da zona: Ares, Cabanas, Ferrol, Miño, Mugardos, Narón, Neda, Paderne, Pontedeume.
