Nova
A Xunta constitúe o Consello Reitor da nova Axencia Intecmar para consolidar o seu liderado na monitorización e control do medio mariño
1 de 2
2 de 2
A conselleira do Mar, Marta Villaverde, presidiu a primeira sesión do órgano que formaliza a culminación do proceso de transformación do instituto en axencia pública
Vilagarcía de Arousa (Pontevedra), 1 de outubro de 2026
A conselleira do Mar, Marta Villaverde, acompañada polo director xeral de Pesca, Acuicultura e Innovación Tecnolóxica, Isaac Rosón, e pola directora xeral de Desenvolvemento Pesqueiro, Ángeles Vázquez Suárez, presidiu a sesión constitutiva do Consello Reitor da Axencia Pública Autonómica para o Control do Medio Mariño de Galicia (Axencia Intecmar) na súa sede de Vilaxoán.
A constitución deste órgano colexiado de goberno supón un fito na culminación da súa adaptación á figura de axencia pública autonómica, aprobada polo Consello da Xunta en cumprimento da Lei de organización e funcionamento da Administración xeral e do sector público autonómico de Galicia.
Con este novo marco xurídico e organizativo, a Xunta blinda e reforza a operativa dun organismo que é referente internacional e Laboratorio Nacional de Referencia de Biotoxinas Mariñas. A Axencia Intecmar continuará prestando con plenas garantías os seus servizos esenciais de seguimento oceanográfico, vixilancia do fitoplancto tóxico, control de contaminantes e aseguramento técnico-sanitario das zonas de produción de moluscos bivalvos, achegando a máxima seguridade alimentaria e rigor científico ao servizo do sector marítimo-pesqueiro galego.
