Nova
A Xunta promociona na feira San Sebastián ‘Gastronómika’ os produtos alimentarios galegos
A Consellería do Medio Rural apoia a presenza de oito empresas amparadas por distintivos de calidade diferenciada no evento e organizará diversas actividades, entre as que se inclúen dúas vinculadas cos viños premiados nas Catas de Galicia 2026
Pola súa parte, a Consellería do Mar facilita a presenza de seis empresas do sector e desenvolverá unha programación de degustacións centrada nos produtos pesqueiros e marisqueiros galegos e nas súas marcas de calidade
Santiago de Compostela, 4 de outubro de 2026
Galicia estará presente nunha nova edición da feira San Sebastián Gastronómika, na que a Xunta promocionará os produtos alimentarios galegos do rural, amparados por selos de calidade diferenciada, e do mar. Neste evento de carácter internacional, que se celebra do 5 ao 7 de outubro na cidade vasca, as consellerías do Medio Rural e do Mar contan cun espazo propio no que están representadas 14 empresas do sector alimentario.
O expositor de Galicia dispón dunha aula de catas e degustacións que servirá de punto de encontro para poñer en valor a diversidade dos produtos agroalimentarios galegos de calidade diferenciada e tamén os do mar.
No caso da Consellería do Medio Rural, estarán representadas oito empresas de produtos amparados por distintivos de calidade -Sacra Pan, Grupo Cuevas, Cienporcel, Lugar da Veiga, Orujos y Licores Augavella, Bodegas Ribada, SAT Egapor e Adega Terras Mancas- que achegarán os seus produtos aos asistentes desta feira. A maiores, disporá dunha programación de actividades para dar a coñecer as características, a calidade e o potencial gastronómico destas elaboracións con selo de calidade.
Dentro da programación tamén se inclúe dúas actividades vinculadas cos viños tintos e brancos premiados nas Catas de Galicia 2026, que permitirán aos visitantes coñecer e degustar unha selección de referencias recoñecidas neste certame, un dos principais escaparates para poñer en valor a excelencia e a diversidade da produción vitivinícola galega.
Cómpre lembrar que desde a Xunta trabállase para potenciar os produtos agroalimentarios de calidade diferenciada e que se vén de lanzar a marca Aquí Sabemos, a nova identidade para dalos coñecer de forma conxunta.
Presenza do sector do mar
Pola súa parte, a Consellería do Mar contará coa presenza de seis empresas coexpositoras —Caviar del Tibet, Conservas Artesanas Gallegas, A Bateeira, Empanadas do Mar, Grupeixe e Ramón Franco— e cunha programación propia destinada a poñer en valor a calidade e a diversidade dos produtos do mar.
Ao longo das tres xornadas celebraranse degustacións e presentacións de mexillón, conservas e outros produtos pesqueiros, así como actividades específicas arredor da marca pescadeRías, de onde senón? e da pesca artesanal galega.
